மூடு

தோட்டக்கலை மற்றும் மலைப்பயிர்கள் துறை

நீலகிரி மாவட்டம் மேற்கு தொடர்ச்சி, கிழக்கு தொடர்ச்சி மலைத்தொடர்களின் சந்திப்பில் அமைந்துள்ளது. இதன் மேற்கே கேரள மாநிலமும், வடக்கில் கர்நாடக மாநிலமும் கிழக்கிலும் தெற்கிலும் கோயமுத்தூர் மற்றும் ஈரோடு மாவட்டங்களும் எல்லையாக அமைந்துள்ளது.

தமிழ்நாட்டிலுள்ள நீலகிரி மாவட்டமானது ஒரு பிரதான தோட்டக்கலை மாவட்டமாகும் பயிர் சாகுபடியிலும், சீதோசண நிலையிலும் அண்டைய மாவட்டங்களைக் காட்டிலும் பெருமளவு வேறுபட்டது. மாவட்டத்தின் மொத்த பரப்பளவு 2545 சதுர கிலோ மீட்டராகும் இம்மாவட்டத்தில் 6 வருவாய் வட்டம் உள்ளது, மேலும் நீலகிரி மாவட்டத்தின் தனிச் சிறப்பு மொத்த பரப்பளவில் 56மூ காடுகளை கொண்டதாகும் கடல் மட்டத்திலிருந்து 900 – 2636 மீட்டர் உயரத்தில் அமைந்துள்ளது. இம்மாவட்டத்தின் சராசரி மழையளவு ஆண்டொன்றிற்கு 1522.7 மி.மீ ஆகும்.

நீலகிரி மாவட்டம் புகழ்பெற்ற சர்வதேச கோடை வசஸ்தலம் ஆகும். இங்குள்ள சுற்றுலா தலங்களின்அழகும் குளுமையும் சர்வதேச சுற்றுலா பயணிகளை கவர்வதாகவுள்ளது. ஆகையால் சுற்றுலா பயணிகளின் எண்ணிக்கை ஆண்டுக்காண்டு அதிகரித்த வண்ணம் உள்ளது.

நீலகிரி மாவட்டத்தில் நிலவக்கூடிய தட்பவெட்ப நிலை பல்வேறு பயிர்கள் சாகுபடிக்கு உகந்ததாக உள்ளது, முறையே காய்கறிகள், பழங்கள், வாசனை திரவிய பயிர்கள், மலர்கள், மருத்துவ தாவரங்கள் மற்றும் மலைத்தோட்ட பயிர்கள் ஆகியவை படிமட்டங்கள் (Terrace cultivation) மற்றும் சில கிராமங்களில் குறுகிய சரிவான பரப்பில் சாகுபடி செய்யப்படுகிறது.

நீலகிரி மாவட்டத்தின் உயரத்தை பொருத்து மூன்று விதமான நிலைகளில் சாகுபடி மேற்கொள்ளப்பட்டு வருகிறது.

  1. குளிர்கால பயிர்கள் (Temperate Crops)
  2. மிதவெப்ப மண்டல பயிர்கள் (Sub -Tropical Crops)
  3. வெப்ப மண்டல பயிர்கள் (Tropical Crops)

மலையின் உயரமான பரப்பில் உருளைக்கிழங்கு, முட்டைகோஸ், கேரட், பீன்ஸ், பிளம், பீச், பேரி, மற்றும் இதர வகைபயிர்கள் சாகுபடி செய்யப்படுகிறது. மலையின் இடைப்பட்ட பகுதிகளில் கமலாஆரஞ்சு, காப்பி சாகுபடி செய்யப்படுகிறது. குறைந்த உயரப்பகுதிகளில் கிராம்பு, ஜாதிக்காய், மிளகு, இஞ்சி மற்றும் துரியன், லிச்சி, ரம்பூட்டான், மங்குஸ்தான் போன்ற பழங்கள் பயிரிடப்பட்டு வருகிறது.

தோட்டக்கலை பயிரான காய்கறிகள் நீலகிரி மாவட்டத்தில் ஆண்டிற்கு மூன்று பருவங்களாக சாகுபடி மேற்கொள்ளப்பட்டு வருகிறது.  அவையாவன

  1. நீர்போகம் (Irrigated Season)
  2. கார்போகம் (Main Season)
  3. கடைபோகம் (Autumn Season)

நீலகிரி மாவட்டத்தில் 2019 – 20 ஆண்டு கணக்கின்படி 73406.00 ஹெக்டர் பரப்பளவில் 83,125 விவசாயிகள் வேளாண்மை மேற்கொண்டு வருகின்றனர்.

தோட்டக்கலை மற்றும் மலைப்பயிர்கள் துறை வாயிலாக நீலகிரி மாவட்ட விவசாயிகள் பயனடையும் பொருட்டு கீழ்கண்ட திட்டங்கள் செயல்படுத்தப்பட்டு வருகிறது.

  1. ஒருங்கிணைந்த தோட்டக்கலை அபிவிருத்தி இயக்கம் (MIDH)
  2. பிரதம மந்திரி நுண்ணீர் பாசனத்திட்டம் (PMKSY)
  3. கூட்டுப் பண்ணையம் திட்டம் (Collective farming)
  4. சிறப்பு பகுதி மேம்பாட்டுத் திட்டம் (SADP)
  5. பிரதம மந்திரி பயிர் காப்பீட்டுத் திட்டம் (PMFBY)
  6. தேசிய வேளாண்மை வளர்ச்சி திட்டம் (NADP)

1.ஒருங்கிணைந்த தோட்டக்கலை அபிவிருத்தி இயக்கம் (MIDH)

தோட்டக்கலை பயிர்கள் சாகுபடியில் ஒரு ஒட்டுமொத்த வளர்ச்சியை ஏற்படுத்துதல், குறிப்பாக பரப்பு விரிவாக்கம், பாதுகாக்கப்பட்ட சூழலில் பயிர்வளர்ப்பு தோட்டக்கலை பணிகளை இயந்திரமாக்குதல், பண்ணை குறைபாடு களைதல், புதிய நீர்நிலையை உருவாக்குதல், புதிய தொழில்நுட்பங்கள் விவசாயிகளிடையே பரப்புதல், உயர்ரக காய்கறி சாகுபடி, ஒருங்கிணைந்த அறுவடை பின்நேர்த்தி, மகரந்த சேர்க்கை ஊக்குவித்தல், சந்தை கட்டமைப்பு வசதிகள் மற்றும் விவசாயிகள் பயிற்சி போன்ற அனைத்து பணிகளையும் ஒருங்கிணைப்பு செய்து இதன் வாயிலாக இளைஞர்களுக்கு வேலைவாய்ப்பை உருவாக்கி கொடுத்தல் ஆகும்.

மேற்காணும் நோக்கத்தின் அடிப்படையில் நீலகிரி மாவட்டத்தில் நிலவும் சீதோஷ்ணநிலைக்கு ஏற்றவாறு விவசாயிகளுக்கான திட்டங்கள் 50 சதவீதமானிய விலையில் செயல்படுத்தப்பட்டு வருகிறது.

2. பிரதம மந்திரி நுண்ணீர் பாசனத்திட்டம் ( PMKSY)

“Per Drop more Crop” என்ற குறிக்கோளுடன் தண்ணீர் பயிர்களுக்கு தேவையான அளவு உபயோகித்து பயிர் உற்பத்தியை அதிகரிக்கும் நோக்கில் சீரிய பாசன முறையான நுண்ணீர் பாசன திட்டம் விவசாயிகளுக்கு செயல்படுத்தப்பட்டு வருகிறது. இம்மாவட்டத்தில் பயிர் செய்யப்படும் பயிர்களுக்கு தெளிப்பு நீர் பாசனம் மிகவும் உகந்ததாக இருப்பதால் காய்கறி பயிர்கள் மற்றும் தேயிலை பயிருக்கு சிறு, குறு விவசாயிகளுக்கு 100 சதவீத மானியத்திலும், இதர விவசாயிகளுக்கு 75 சதவீத மானியத்தில் இப்பாசன திட்டம் செயல்படுத்தப்படுகிறது.

3.கூட்டுப் பண்ணையம் திட்டம் (Collective farming)

சிறு மற்றும் குறு விவசாயிகள் பயன்பெறும் வகையில் அவர்களை ஒருங்கிணைந்து கூட்டுப் பண்ணைய முறையை ஊக்குவித்தல் ஒருங்கிணைந்த கடன் வசதி பெறுதல், ஒருங்கிணைந்த இடுபொருட்கள் வாங்குதல், சிறந்த தொழில்நுட்ப முறைகளை பின்பற்றுதல், முன் மற்றும் பின் சந்தை இணைப்பு தொடர்களை ஏற்படுத்துதல் போன்றவையாகும்.

நீலகிரி மாவட்டத்தில் 20 விவசாய ஆர்வலர் குழுக்கள் அமைக்கப்பட்டுள்ளது. 5 விவசாய ஆர்வலர் குழுக்களை ஒருங்கிணைத்து உழவர் உற்பத்தியாளர் குழு அமைக்கப்பட்டுள்ளது.

நீலகிரி மாவட்டத்தில் கூட்டுப்பண்ணையம் திட்டத்தில் 80 விவசாய ஆர்வலர் குழுக்கள் மற்றும் 16 விவசாய உற்பத்தியாளர் குழுக்கள் அமைக்கப்பட்டுள்ளன, திட்ட செயலாக்கம் ஒப்புதல் அளிக்கப்பட்டு ஒவ்வொரு உழவர் உற்பத்தியாளர் குழுவிற்கும் ரூ.5.00 லட்சம் சுழல் நிதி வழங்கப்பட்டுள்ளது.

நீலகிரி மாவட்டத்தில் 16 உழவர் உற்பத்தியாளர் குழுவினையும் ஒருங்கிணைத்து (உழவர் உற்பத்தியாளர் நிறுவனமாக) வேளாண் விற்பனை மற்றும் வணிகத்துறை வசம் மாவட்ட ஆட்சியர் அவர்களால் ஒப்படைக்கப்பட்டுள்ளது.

4.சிறப்பு பகுதி மேம்பாட்டுத்திட்டம் (SADP)

இத்திட்டத்தின் கீழ் தேயிலை நாற்றுகள், தேயிலை பறிக்கும் இயந்திரம், கரவை மாடுகள் வழங்கப்படவுள்ளது மற்றும் இயற்கை வேளாண்மை சாகுபடியை ஊக்குவிப்பதற்காக தற்போது 45.00 ஹெக்டேர் பரப்பளவில் செயல்படுத்தப்படவுள்ளது.

5.பிரதம மந்திரி பயிர் காப்பீட்டுத்திட்டம் (PMFBY)

நீலகிரி மாவட்டத்தில் தோட்டக்கலை பயிர்களான உருளைக்கிழங்கு, முட்டைகோஸ், கேரட், பூண்டு, இஞ்சி, வாழை மற்றும் மரவள்ளி பயிர்களுக்கு பயிர்காப்பீடு செய்வதற்கு அறிவிக்கை செய்யப்பட்டுள்ளது. கூடலூர் வட்டாரத்தில் மரவள்ளி, இஞ்சி, மற்றும் வாழை பயிருக்கும் உதகமண்டலம், குன்னூர், கோத்தகிரி வட்டாரத்தில் உருளைக்கிழங்கு, முட்டைகோஸ், கேரட், மற்றும் பூண்டு போன்ற பயிர்களுக்கும் பயிர் காப்பீடு அறிவிக்கப்பட்ட கிராமங்களில் செயல்படுத்தப்பட்டு வருகிறது.

6. தேசிய வேளாண்மை வளர்ச்சி திட்டம் (NADP)

பரப்பு அதிகரித்தலின் கீழ் கமலா ஆரஞ்சு பழச்செடிகள் 236.00 ஹெக்டர் பரப்பளவில் விநியோகப்படவுள்ளது.